Մարդը ափի մեջ

«Մարդը ափի մեջ», Պարույր Սևակի բանաստեղծությունների շարքերից (1963)։

Քաղվածքներ

• Եթե սիրվել՝

միայն մեկի՛ց և մե՜կ անգամ… - Ուզում եմ

• Եվ լինել անհոգ, և անդարդ լինել,

Պարզապես սիրո՜ղ – ապրո՜ղ մարդ լինել... - Հանգստանում եմ

• Հողն ավելի լավ ես զգում

Այն ժամանակ,

Երբ նա հանկարծ տատանվում է

Քո ոտքի տակ… - Կարծում եմ

• Մայրը միշտ մայր է, որդիքն են տարբեր... - Ինքս ինձ հերքում եմ
• Եթե մեռնե՜լ…

Թո՛ղ որ մեռնեմ

հուր-կայծակից՝

Միանգամի՛ց,

մի վայրկյանո՛ւմ,

հանկարծակի՛... - Մեռնել

• Ապրե՜լ, ապրե՜լ, այնպե՛ս ապրել,

Որ սուրբ հողըդ երբեք չզգա քո ավելորդ ծանրությունը։

Ապրե՜լ, ապրե՜լ, այնպե՛ս ապրել,

Որ դու ինքդ էլ երբեք չզգաս քո սեփական մանրությունը։ - Ապրել

• Վստահեցին ոմանք ինձ – հոգիս դարձավ գաղտնարան,

Վստահեցի շատերին – գաղտնիքս առան ու տարան։ - Մի պահ զղջում եմ

• Խոստանում եմ

Լինել ո՛չ թե հարկահավաքը,

Այլ զավա՜կը

Դժվար դարի... - Խոստանում եմ

• Խոստանում եմ

Բաց ճակատով զուր չխփվել հաստ պատերին։

Ինչի՞ համար.

Էլի՛ պատը կմնա պատ,

Կպակասի մի լավ ճակատ։ - Խոստանում եմ

• Ինչո՞ւ խփվել պատեպատ էլ.

Մի՞թե աչքի արձակուրդ է

Կամ ուղեղի հանգըստյան օր… - Խոստանում եմ

• Խոստանում եմ

Ոմանց նման իզուր տեղը չխոստանալ… - Խոստանում եմ

• Ես կարդում եմ և… հասկանում,

Որ թեպետ և ինձ հերոսի տեղ եմ դնում,

Բայց շատ հաճախ նրա ճամփից շեղ եմ գնում... - Կարդում եմ

• Բառերն էլ մինչև կարգին չգժվեն՝

Ե՜րգ չեն դառնալու…

Ա՜խ, ուր էր թե ես միշտ գի՛ժ լինեի… - Գժվում եմ

• Աղաչում եմ.-

Մի՛ վախեցեք անկեղծ խոսքից.

Անկեղծ խոսքը չի սպանում,

Փակ խոցեր է միայն բանում։ - Աղաչում եմ

• Այս մի թասն էլ՝ նրա՛նց կենաց, ովքեր կյանքում

Թեկուզ ծանըր կարիքի մեջ ու զրկանքում

Ընդունում են

Ու տանում են

Ամե՜ն հարված,

Բայց մնում են

Էլի կյանքին սիրահարված։ - Հրավիրում-ուրախանում եմ

• Խմենք կենացն անդավաճան ընկերության,

Ընկերների ա՛յն սերության,

Որ մինչև իսկ չի ընդհատվում

Աքսորի մեջ ու գերության։

Ընկե՛ր լինենք

Նույն հուզմունքի,

Համոզմունքի՛,

Նույն ճաշակի՛,

Դրոշակի՛,

Ո՛չ թե ընկեր լոկ բաժակի… - Հրավիրում-ուրախանում եմ

• Ասում են, թե առանց սիրո

Կարելի է մեկտեղ ապրել։

Ես ժխտում եմ.

Կարելի է չմահանա՜լ,

Ո՛չ թե ապրել։ - Ժխտում եմ

Արտաքին հղումներ

• Մարդը ափի մեջ
• Մարդը ափի մեջ